ئەمساڵ تا ئێستا زیاتر لە 26 هەزار ڕووداوی ئاگرکەوتنەوە لە عێراق تۆمار کراوە

بەرپرسێکی حکومەتی عێراق ڕایگەیاندووە کە ئەمساڵ تا ئێستا زیاتر لە 26 هەزار ڕووداوی ئاگرکەوتنەوە تۆمار کراوە کە لە نەخۆشخانەکان، فەرمانگە و ناوەندە حکومی و ناحکومییەکان ڕوویان داوە.

لە ئامارەکانی حکومەتی عێراقدا ئاماژە بە ژمارەی قوربانییەکانی ئەو 26 هەزار ڕووداوی ئاگرکەوتنەوە نەدراوە بەڵام مەزندە دەکرێت کە بە سەدان کوژراو و بریندار بێت، بۆ نموونە، تەنیا لە ڕووداوی ئاگرکەوتنەوەی نەخۆشخانەکەی ناسریە زیاتر لە 100 کەس کوژران و بە دەیان کەسی دیکە برینداربوون و سووتان.

هاوپەیوەند لە گەڵ ئەمەش، جەودەت عەبدولڕەحمان وتەبێژی فەرمانگەی بەرگری شارستانیی عێراق ڕایگەیاند کە ئەمساڵ تا ئێستا زیاتر لە 26 هەزار ڕووداوی ئاگرکەوتنەوەی بچووک و گەورە لە وڵاتدا ڕوویداوە.

ناوبراو وتی: زۆربەی ڕووداوەکان بە هۆی شۆرتی کارەباوە بووە و تەنیا بەشێکی زۆر کەم لەوان بە ئەنقەست ڕووی داوە.

هەروەها عامر فایز کاندیدی دەرچووی هەڵبژاردنە پەرلەمانییەکەی تشرینی یەکەمی عێراق ڕایگەیاندووە کە هۆکاری سیاسی و بەرژەوەندی کەسی لە پشتەوەی زۆربەی ڕووداوەکاندا بووە.

ناوبراو ڕایگەیاندووە کە بەشێک لە ئاگرکەوتنەوەکان بە هۆکاری سیاسی و بەشێکی دیکە بە هۆکاری ئابوری و بەرژەوەندی کەسی بووە، بە تایبەت هەندێک لەو ڕووداوانە بۆ ئەوە بووە کە عێراق لە ڕووی بەرهەمەکانی کشتووکاڵەوە بەردەوام وەک وڵاتێکی هاوردەکار بمێنێتەوە.

فایز ڕەخنەشی لە حکومەتی عێراق گرتووە و ڕایگەیاندووە کە زۆربەی لێژنەکانی لێکۆڵینەوە وەک ئەوانەی تایبەت بە گەندەڵی و تیرۆر و کوشتنەکان، بە هیچ ئەنجامێک نەگەیشتووە./.