نێچیرڤان بارزانی بە بۆنەی سەری ساڵی نوێوە داوایەک لە حکومەتی بەغدا دەکات

سەرۆکی هەرێمی کوردستان بە بۆنەی هاتنی ساڵی نوێ پەیامێکی بڵاو کردەوە.

لە پەیامەکەی نێچیرڤان بارزانیدا هاتووە کە ئێمە لە هەرێمی کوردستان لە گەڵ جیهان بە هۆی بڵاوبوونەوەی نەخۆشیی کۆرۆنا و لێکەوتەکانی، دوو ساڵی سەختمان بەڕێکرد و لە ڕوبەڕوبونەوەی تیرۆریزم بەردەوام بووین و ڕووداو و بەسەرهاتی دڵتەزێنی کۆچ و کاریگەری خەراپی گۆڕانی کەشوهەوا و لافاومان بینی.

لە بەشێکی دیکەی ئەو پەیامەدا هاتووە کە لە عێراقیش بە سوود وەرگرتن لە هەڵەکانی ڕابردوو، هەڵدانەوەی لاپەڕەیەکی نوێ، تێگەیشتنی ڕاستەقینە و ئیرادەی جیدی بۆ چارەسەرکردنی کێشەکان، یەکتر قبووڵکردن و هاوبەشی ڕاستەقینەی هەمووان لە پرۆسەی سیاسی و بەڕێوەبردنی ولات لە سەر بنەمای درووست پێویستە، کە متمانە و ئارامی و سەقامگیری بگێڕێتەوە و بە ژیان و گوزەرانێکی باشتر بۆ هەمووان لە ئێستا و داهاتووی خۆیان دڵنیا بن./.