مستەفا چاوڕەش باس لە پرۆسەی یەکگرتنەوەی هێزەکانی پێشمەرگەی کوردستان دەکات

بەرپرسی هێزەکانی حەفتای پێشمەرگەی یەکێتی نیشتمانی کوردستان ڕایگەیاند کە هاوپەیمانان فشاریان خستووەتە سەریان بۆ یەکگرتنەوەی پێشمەرگە بەڵام ئەم پرسە دەبێت لە سەر ئاستی باڵا لە نێوان یەکێتی و پارتی بڕیاری لە سەر بدرێت.

مستەفا چاوڕەش وتی: پرسەکە هەر یەکڕیزی پێشمەرگە نییە، پێش هەموو شتێک پێویستە یەکێتی و پارتی دڵی خۆیان چاک بکەن و هەر دوو مەکتەبی سیاسی کۆببنەوە و بڕیاری لە سەر بدەن، شتەکان ئاسایی بکەنەوە و ئەم ئۆباڵە گەورەیە نەخەنە سەر هێزی پێشمەرگە کە بۆچی یەکناگرنەوە.

ناوبراو وتی: هەر دوو لا بەرپرسن لەوەی کە بۆ ساڵ و نیوێکە دانیشتن نەکراوە، هەر دوو حیزب هێزی چەکداریان هەیە و پێویست بەوە دەکات لە ئاستی باڵادا یەکلایی بکەنەوە.

مستەفا چاوڕەش وتی کە یەکێتی و پارتی بە هێزەکانی حەفتا و هەشتا دەناسرێن و ئەگەر ئەو هێزانە نەبێت کەس حسێبیان بۆ ناکات.

وتیشی کە بۆ یەکگرتنەوەی پێشمەرگە، هاوپەیمانان بەڵێنی هەموو شتێکیان داوە و ڕەنگە تەنیا فڕۆکە و دەبابەی تێدا نەبێت./.