هاوپەیمانی نێودەوڵەتی بە مەرجێک ئامادەیە لە عێراق بکشێتەوە

وتەبێژی هاوپەیمانی نێودەوڵەتی دژ بە داعش ڕایگەیاند کە هێزەکانیان لە سەر داوای حکومەتی عێراق لەم وڵاتەن و ئەگەر عێراقیش بیەوێت لەم وڵاتە دەکشێنەوە.

واین مارۆتۆ وتەبێژی هێزەکانی هاوپەیمانی نێودەوڵەتی دژ بە داعش، سەبارەت بە چارەنووسی ئەم هێزانە لە عێراق، وتی کە تەنیا لە سەر داوای فەرمی حکومەتی عێراق، هێزەکانی هاوپەیمانان لەم وڵاتە دەکشێنەوە.

ناوبراو جەختی لە سەر پابەندبوونی هاوپەیمانی نێودەوڵەتی بۆ هاوکاریکردنی عێراق لە شەڕی دژ بە داعش و هەروەها بۆ بەرەنگاربوونەوەی لە یاسا دەرچووەکان کردەوە.

وتەبێژی هاوپەیمانی نێودەوڵەتی وتی کە هەندێک گرووپی چەکدار لە هێرشەکانیان بۆ سەر پێگە و هێزەکانی هاوپەیمانان بەردەوامن و ئەمەش لە ڕاستیدا هێرشی سەر هێزە ئەمنییەکان و خەڵکی عێراقە.

وتیشی کە هێزە ئەمنییەکانی عێراق پێشکەوتنی بەرچاویان لە شەڕی دژ بە داعشدا هەبووە و ئەمەش وایکردووە کە ئەمریکا ژمارەی هێزەکانی لە 5 هەزار سەربازەوە بۆ 2 هەزار و 500 سەرباز کەم بکاتەوە./.