سوننەکان بە هاوکاری چەند لایەنێک پۆستی سەرۆک کۆماریان دەوێت

تورکیا هەوڵەکانی خستووەتەگەڕ بۆ ئەوەی ئەمجارە لە بڕی کوردێک کەسێکی سوننە ببێتە سەرۆک کۆماری عێراق. ئەو کەسەش محەممەد حەلبوسی سەرۆکی پێشووی پەرلەمانی عێراق و سەرۆکی هاوپەیمانی تەقەدومە.

چەند سەرچاوەیەکی میدیایی تورکیا و عێراق ئاماژەیان بەوە داوە کە ئەردۆغان پێش هەڵبژاردنەکان لە گەڵ هەر دوو لایەنی سوننە – حەلبوسی و خنجەر – و هەروەها پارتی دیمۆکراتی کوردستان کۆبووەتەوە.

تورکیا پارتی و سوننەکانی بۆ پێکهێنانی کابینەی نوێی عێراق خستووەتە یەک بەرەی دانوستانەوە و بۆ ئەمەش شێعەکان ئاگادار کراونەتەوە.

بڕیارە لەم پرۆژەی تورکیا پارتی پۆستی سەرۆکی پەرلەمانی عێراق وەربگرێت. ئەمەش لە کاتێکدایە کە بەرپرسانی پارتی بەردەوام باسی ئەوەیان کردووە کە پۆستی سەرۆک کۆمار پشکی کوردە و دەبێت بە ڕێکەوتنی لایەنە کوردییەکان کاندیدەکەی یەکلایی بکرێتەوە. دیار نییە کە هەڵوێستی یەکێتی لە سەر ئەم پلان و بەرنامەی نوێی تورکیا چۆن دەبێت./.