سەرۆک وەزیرانی عێراق پێنج بڕیاری کۆرۆنایی دەرکرد

سەرۆک وەزیرانی عێراق بە مەبەستی ڕێگری لە بڵاوبوونەوەی زیاتری ڤایرۆسی کۆرۆنا لەم وڵاتە چەند بڕیارێکی دەرکرد.

ئەو پێنج بڕیارەی مستەفا کازمی بریتین لە:

یەکەم: جێبەجێکردنی بڕیارەکانی لێژنەی باڵای بەرەنگاربوونەوەی کۆرۆنا بە تایبەت داخستنی سنورەکان لە گەڵ ئەو وڵاتانەی کە ڤایرۆسەکە لەواندا سەریهەڵداوە.

دووەم: وەزارەتی دەرەوەی عێراق لە ڕێگای سەرجەم باڵیۆزخانەکانەوە لە وڵاتانی دەرەوە، هەماهەنگی لە گەڵ ئەو وڵات و کۆمپانیانەدا بکات کە ڤاکسێنی کۆرۆنایان بەرهەمهێناوە بۆ ئەوەی کە بەپەلە ڕەوانەی عێراق بکرێت.

سێهەم: سەرەتا دەبێت ڤاکسێنەکە بەو کەسانە بدرێت کە لە دەزگا تەندرووستییەکاندا کار دەکەن.

چوارەم: قەدەغەکردنی گێڕانی پرسە و بۆنە ئائینییەکان لە وەقفەکانی سوننە و شێعە و کەنیسەکانی مەسیحی و پەرستگەی ئێزدی و ئائینەکانی دیکە.

پێنجەم: پابەندکردنی وەزارەتی پەروەردە بە یەک دەوامی لە قوتابخانەکان و گرتنەبەری ڕێکارەکانی خۆپارێزی و هاوکاریکردنی دەزگا تەندرووستییەکان لە لایەن قوتابخانەکانەوە و ئەنجامدانی پشکنین و چاودێریکردنی دۆخی تەندرووستی قوتابیان و خوێندکاران./.