هەرێمی کوردستان بە باشی بەڕێوە نەبراوە

ئارێز عەبدوڵڵا

ئەم ڕستەیەی سەرەوە قسەی نوێنەری تایبەتی سکرتێری گشتی نەتەوە یەکگرتوەکانە، کە ئەمڕۆ لە کۆبوونەوەی ئەنجومەنی ئاسایشی نێودەوڵەتی کردی.

خاتوو پلاسخارت زووتریش وەک دۆستێکی دڵسۆزی گەلی کوردستان و بەرپرسیاریەتیە نێودەوڵەتیەکەشی چەند جارێکی تر ھۆشداری دابووە لایەنە کوردستانیەکان، بەڵام کاتێک کە راسپاردە و ئامۆژگارییەکانی دادنادەن، بەو شێوەیە و لەسەر بڵندترین سەکۆی سیاسەتی جیھانی ڕەخنە لە ھەرێم و ھەردوو ھێزە دەسەڵاتدارەکە دەگرێ.

دیارە ئەگەر ئەو رەخنەگرتنەشی سوودی نەبێت و بەخۆداچوونەیەوەکی سەرلەبەر نەکرێت، ئەگەری لە گرێژنە چوونی بارودۆخی ھەرێمی کوردستان لە گوینە.

ئێستا کاتی تۆمەت بەخشینەوە و ئۆباڵ خستنە پاڵ یەکتری نییە و لەھەمان کاتیشدا ھێشتا دەرفەت ماوە و نابێ لە دەست بدرێ، بەڵام ئەگەر پرسیار لە بەندە بکرێ کێ ھۆکاری دروستبوونی ئەو بارودۆخەیە؟

لە وەڵامدا کەمترین شت کە دەبێ بیلێم: ھەژموون و جومگەکانی دەسەڵات لای کام ھێزن ئۆباڵی سەرەکی و ئەرکی چارەسەرکردنیشی بە پلەی یەکەم ھەر لە ئەستۆی ئەون. لەگەڵ ئەوەشدا پێویستە ھەموو لایەنەکان ھەر یەکە و بەپێی راددەی بەرپرسیاریەتیەکەی بۆ چارەسەرکردنی گرفتەکان و بەھێزکردنەوەی قەوارە و پێگەی حکومەتی ھەرێم بێنەوە مەیدان.

ئەوەی پلاسخارت وتی زەنگێکی مەترسیدارە و زۆر لایەنی ھەرێمی و نێودەوڵەتیش چارەی کوردستانیان ناوێ، بۆیە ھۆشیاربوونەوە و ئاگاداربوون ئەرکن./.